هديّة: قصيدة للشاعر المرحوم خليل روكز
ياريت عندي وآآآآآآآآخ لوفيي
عا قـد حبـي جبلـك هديـة
كنت بهديكي شـذا الـوردات
وأسـرار أحلام الطفوليـة
وكنت بتعمشق على النجمـات
بسحّب شلـل خيطـان فضيـة
وبكلف ملايك ... وحوريـات
تحَيّكِْلْـك بـلـوزة ألوهـيـة
***
وبالبحر .. كنت بغافل السمكات
وبغطس متل فكـر الحراميـة
وبقطف زبد من رغوة الموجات
ومن جدايـل شمـس مرخيـة
بكمش وهج وبحولو بوسات
بلـون أشواقـي المـورديـة
ومن هون ببعتها من النسمات
الهونيك لعيونك خصوصية
***
والطفل كنت بقشطو البسمات
وبغرف من عيونو صفا نية
وعرس الربيع بشلّحو الغنجات
وكلشي معو لهفـات عطريـة
وبكلخ من جفون السحر دمعات
كلها غيرة وحنية
وبلفها بعيون خمريات
وبروح حافي بسلّمك هيي
***
ومن كل طير بنتف الريشات
وبفلش طريقك ريش حرية
وعا المروج بسابق النحلات
بجبلك ضمير زهور بكرية
وبطير مع أحلام وخيالات
عا بلاد مدري وين مبنية
وبجدلّك من سوالف الغيمـات
مرجوحتـك ع كتـاف جنيـة
***
وبغزلك من شراشف الهمسات
وحرام مـن قلـب النعوميـة
وجّوْدَلْة من السحر ومخـدات
مـن شعر آلهـة الفينيقـيـة
***
وبرش عا عيونك هنا الغفوات
المحروم منها حظ عينيي
وخلي الحلم يحكيلك حكايات
عن حالك الحالك غراميي
هيهات لو عندي فعل هيهـات
عا قد مـا عنـدي أنـا نيـة
بحولك إنتي أنـا بالـذات
وبلبّسـك روحـي الطبيعيـة
لكـن إذا فشلـو التمنـيّـات
وعمـري استسلـم للعبوديـة
بترك إلك مني تـلات كلمـات
محبتي ... والآخ ... والنهدات
--- من القلب هل بيحبِّكْ هدية قصيدة مني للشاعر موسى زغيب
وبتمنى ينال اعجابكم
------------------
مرة سحرني الهوى بقلب القفص عصفور
وهديوا لابوكي وما كان القصد كرمالو
كرمال عينك إذا بدك أغاني طيور
يسهر يغني لك وتغفي ع موالو
وبالليل جبتي القفص ع غرفتك والنور
تسلل من فتحة الفستان ضوالو
ما كان عندك عِلم تتستري المحظور
العصفور هذا انا ورَح ينشغل بالو
صرتي تفكي العراوي و العجين يفور
والضو يعكس وهج وكنوزك يلالو
يمرق خيالك سحر ع العاشق المسحور
ويجن فيه العشق ويقاتل خيالو
واول ما فاح العطر وتكشف البلور
وقطعه ورا قطعه الحراير عنك انشالو
بلش يروح ويجي وتحرقص ومقهور
بدو يذوق الحلو ومش قادر يطالو
ولما دلقتي الذهب ع شراشف المقصور
وصاروا طيور الثلج يتغنجوا قبالو
تشردق بدمعه وظل بجانحه المكسوريشبِّق بهاك القفص حتى قتل حالو
******
طليع حمدان
الى فيروز
-----------
بعدو القمر ع تلالنا سهران
يحكي حكايا الكان ياما كان
حلوة السَحَر ع شالها مدروز
كترت ما فيها تجرح الوجدان
بنهداتها صوب السما بتجوز
وبصوت انقى من صفا المرجان
بتزرع ليالينا العتيقة كنوز
وبتقول نحنا و القمر جيران
فيروز يا تاريخنا المغروز
بأرض القداسة من مدى الازمان
يا زاد خير لشعبنا المفروز
يا شموخ مدلج ع جبل صوان
ارزة المجد، المجد ما بتعوز
ومهما عليكي تأمروا التيجان
بتبقي يا فيروز الارز فيروز
الاكبر من العتمة و من النسيان
ومتل الارز صورة لمجد لبنان
............
حوار
القرادي بمباراة البابلية :
زين شعيب / زغلول الدامور
خليل شحرور / طليع حمدان
خليل شحرور
كنا نجرح ونداوي --- بالميريلاند على طول
بعدو بيحكي فرنساوي ---ا نشا لله ما يكون الزغلول
فرنساوي تعلم عا طول--- بسنة العشرين الرجال
لا بيحولولا بيزول --- وبعدو عا ذات الموال
جايي وبدي للزغلول --- الليلة بجنوب الأبطال
وقلو يحكي قبلاوي --- جبلو حطة وجبلو عقال
زغلول الدامور
عا لغتنا القومية --- فرنساوي بحكي وبغار
وبتشرف بالكفية --- وعندي عقال من الأشعار
حبوني وشهدو فيي --- وبالميريلاند الأنصار
احكي قبلاوي وخليك --- واليوم قصدتك عالدار
مخرسن قاعد بالزاوي
خليل شحرور
ولو أغلى جنوبي بتنعد --- ان صرت جنوبي مش زعلان
تسافر وعليي ترتد --- لاكن خايف من لبنان
يحكي بداوي عن جد--- في باشا بالأردن كان
بطل يحكي بداوي --- ولما سافر من عمان
زغلول الدامور
وبحالي مني مغشوش --- الله خالقني فنان
ومش عاشبر مويي بفوش --- بحكي بغني بألف لسان
كل شي في الدنيا عروش --- ولو عطيوني الأميركان
من توتتنا جوز كبوش --- ما بعطيهن من لبنان
ولاالشروال ولا الطربوش --- ولا بنسى جراب الرعيان
جدي فيها متغاوي --- ولا هاك اللبادي الكان
خليل شحرور
ولا بالمأكل والملبس --- القصة مش قصة تجريب
من خيوط الشمس المحبس --- ولا من اللبادي البتجيب
نحنا وأنتو بالمغطس --- تا جرح الأوطان يطيب
واللي تأمرك وتفرنس --- شبعنا تهويد وتعريب
وحط الواوي بالمكبس --- الديب على نعجاتك جيب
ولا بيجلس ديل الواوي --- لا بيتغير طبع الديبزغلول الدامور
وعطر الزهر ببستانو --- لبنان الكان كلو زهور
ويا حينو يا ضيعانو --- صفى لا زهور ولا عطور
ويحرسأرزة لبنانو --- حتى الأعمى يشوف النور
ويضويالبيت بسكانو --- للكرم نرد الناطور
نوينا نكلخلو سنانو--- نحنا للديب المغرور
عاقتل الواوي ناوي --- وأنت انشا لله يا شحرور
طليع حمدان
الزين وزغلول الجذاب --- عالبوابي في سبعين
يللي بيحضر يعني غاب --- وينو يللي بيحضر وين
يا محمد عبد الوهاب --- حاجي تقولو يخزي العين
متل السيد مكاوي --- عنا غناني السيد زين
زين شعيب
يا زغلول بهداوي --- احكي فرنساوي ولا تخاف
ومافي قاف فرنساوي--- وحمدان بيحكي بالقاف
عندك صوت بيحيي الموت --- يا بو شادي بغنانيك
ومن فيروز بتربح صوت --- ميادة جايي تهنيك
مابيفيدك حسن الصوت --- بس بهالعركة يا شريك
ولا ميادة الحناوي --- لا فيروز بتشفع فيك
طليع حمدان
واسأل تاريخ الراوي --- حرف القاف بعسكرنا
أكبر راس فرنساوي --- كرامة أدهم كسرنا
بتسال عني مش عنك --- ميادة الملياني كنوز
يا شباط بيضحك سنك --- لما بتغني بتموز
نغمتها أشعر منك --- وفيروز بعقد الفيروز
زرار وفاتو بعراوي --- شعري وحنية فيروز
زين شعيب
عراوي وزرار بفستان --- يا فيروز بفيروزين
بصوتك وبصوت النسوان --- جايي تتمرجل عا زين
الليلة نشوفك يا حمدان --- البعدو ناقص يخزي العين
ومهضوم وخصرك لاوي --- الحمرة عشفافك رطلين
طليع حمدان
لاوي عالوردة الحمرة --- اتركني متل المنتورة
تا حمرة شربت حمرة --- الفوق خدودي معصورة
بحياتك يا بو سمرة --- ويا بو خلقة مشهورة
لخيك سامي الصيداوي ---تصور وبعتلو صورة
زين شعيب
مطرب غنا بيوت النصر --- سامي الصيداوي المعروف
بترقصلو ستات القصر --- وزين شعيب ان هز دفوف
تترقوص وتهز الخصر --- بدنا منك يا بن الشوف
وطبلةأحمد برجاوي --- عا نغمة جرجي وسوف
----------------خليل شحرور: وينك يا عمر الهني
------------
وينك يا عمر الهني ويا ليل موّالي
اسمك بقلبي الحزين ورسمك قبالي
معقول انسى الشمع كيف الشمع بيدوب
لوما بليلك حياتك دايبه ليالي
معقول انسى هواك وإنت يا محبوب
عايش ببالي وما عم تروح من بالي
وكل ما خيالي مرق ع خيالك المهيوب
خلّلي خيالك يجي ليله مع خيالي
مكتوب ببعت بحسرات الدمع مكتوب
وإنت ببريد العطف ما بتبعت رسالي
نيال قلبو الما عند بهالدني محبوب
ويا ويل قلبو اللي قلبو من الهوا خالي
بجرّب بريشة نغم وبكاسة المشروب
طفّي لهيب الجمر عافرقة الغالي
برجع عاخد القلق شوف الدمع مسكوب
وأكتر ما غالي الجمر دمع الهجر غالي
بجرّب بغروب الشمس اهرب من المكتوب
وشوفك عاخدّ القمر بالميّ بتلالي
برجع بشوف العمر آخر حياتو غروب
بفزع عَ حالي لإنك ساكن بحالي
الثلاثاء أغسطس 30, 2011 2:07 am
